Украінскі журналіст і відэаблогер Уладзімір Золкін узяў інтэрв'ю ў Віктара Бабарыкі, якога пасля вызвалення разам з яшчэ 108 беларусамі вывезлі ва Украіну. У прыватнасці, ён папрасіў экс-палітвязня пра меркаванне, чый Крым, аднак той прызнаўся, што не гатовы публічна адказаць на гэтае «найскладанейшае пытанне».
На просьбу журналіста агучыць меркаванне наконт прыналежнасці Крыма Віктар Бабарыка са смехам заявіў, што «гэта наогул найскладанейшае пытанне».
— Калі звяртацца да гісторыі, гэта наогул цемра такая, што на гэтае пытанне я не гатовы адказаць. Бо за мой адказ, па-мойму, яшчэ 2020 года мяне раскрытыкавалі за няведанне гісторыі, таму я змоўк і сказаў: «Не ведаю».
Адзначым, яшчэ да затрымання ў чэрвені 2020 года Віктар Бабарыка так адказваў на пытанне «Чый Крым?»:
«Ёсць такое папулярнае пытанне — чый Крым? Ёсць добры адказ — грэцкі».
На ягоную думку, у пытанні пра прыналежнасць Крыма «ёсць пэўныя юрыдычныя, гістарычныя моманты».
— З юрыдычнага пункту гледжання, мабыць, Крым — калі не скасаваныя дамовы, калі яго далучалі… У дэталях таксама буду ўнікаць адказу на прамое пытанне. Бо калі я скажу пра рэферэндум (маецца на ўвазе рэферэндум у Крыме 16 сакавіка 2014 года, дзе 96,77% крымчан, якія прагаласавалі, паводле афіцыйных звестак РФ, выказаліся за ўз'яднанне з Расіяй, а яўка склала блізу 83%. — Заўв. рэд.), то мне скажуць пра юрыдычную нікчэмнасць гэтага рэферэндуму, — сказаў экс-палітвязень.
Ён прызнаўся, што яму «вельмі складана каментаваць узаемаадносіны суседзяў», і растлумачыў, што ў гэтым пытанні не займае нічыйго боку.
— Я не гатовы гэта каментаваць у публічнай прасторы. Давайце пакінем гэта так, — дадаў Бабарыка, падкрэсліўшы, што лічыць «немэтазгодным» у гэты момант наўпрост адказваць на пытанне пра Крым і што гэта яго ўнутраная пазіцыя.
Раней у інтэрв'ю экс-палітвязень таксама адмовіўся наўпрост адказаць, «хто на каго напаў» у расійска-ўкраінскай вайне, патлумачыўшы, што не мае дастаткова інфармацыі для таго, каб скласці ўласнае меркаванне па гэтым пытанні.
Нагадаем, на першай пасля вызвалення прэс-канферэнцыі ў Чарнігаве 14 снежня Бабарыка адказаў на пытанне таго ж Уладзіміра Золкіна пра падтрымку палка Каліноўскага, які дапамагае Украіне абараняць сябе.
— Пытанне не датычыць нацыянальнасці. Пытанне не датычыць слушнасці, няслушнасці або ўсяго астатняга, — стаў адказваць Бабарыка. — Усё, што здзяйсняецца супраць чалавечнасці, — бесчалавечна. Гэта нельга падтрымліваць. Але яшчэ раз падкрэслю: такія дзеянні не могуць падтрымлівацца, яны не залежаць ад таго, дзе чалавек нарадзіўся. Яны залежаць ад маральных прынцыпаў самога чалавека. І іх нельга падтрымліваць ні ў якім разе. Нельга апраўдаць, што гэта можна рабіць, бо «я за справядлівасць». Не, гэтага нельга рабіць. То-бок тлумачэнне, чаму ты гэта робіш, можа быць розным, але ацэнка самога маральнага ўчынку ад гэтага не мяняецца. І таму адказ на вашае пытанне змяшчаецца менавіта ў самім пытанні: такіх людзей нельга падтрымліваць. Але гэта не значыць, што гэта здзяйсняюць выключна, як рускія кажуць, украінцы ці, як украінцы кажуць, рускія. Дакладна гэтак жа, як і ў любой вайне, якая б яна ні была, здзяйсняюцца злачынныя дзеянні, якія нельга падтрымліваць ні ў якай меры. Таму такіх людзей падтрымліваць нельга. Але яшчэ раз падкрэсліваю: гэта не залежыць ад нацыянальнасці.
Чытайце таксама
